އެއްވެސް ސަރަހައްދެއް ބަލަހައްޓަން ބޭރުބަޔަކާ ހަވާލެއް ނުކުރާނަން: ސަރުކާރު

އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ދުނިޔޭގެ ބާރުތަކުން މި ސަރަހައްދަށް ބޮޑެތި އަސްކަރީ އާލާތްތައް ގެންނަންޖެހޭ ކަމަށް ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅަށް ދިވެހި ސަރުކާރުން ވަރުގަދަ ރައްދެއް ދީފިއެވެ.

ރައީސް އޮފީހުން ނެރުނު ހާއްސަ ބަޔާނެއްގައި ބުނެފައިވަނީ، ރާއްޖޭގެ ސަރަހައްދުގައި ހިމެނޭ ބައިނަލްއަގުވާމީ ވިޔަފާރީގެ ކަނޑުއޮޅިތަކާއި ހާއްސަ އިގުތިސާދީ ސަރަހައްދު (EEZ) ހިމެނޭ ގޮތަށް، ދިވެހިރާއްޖޭގެ އެއްވެސް ބައެއް އަސްކަރީ ގޮތުން ނުވަތަ އެ ނޫންވެސް ގޮތަކުން ބެލެހެއްޓުމަށް ބޭރުގެ ފަރާތަކަށް ހުޅުވާލުމަކީ ރާއްޖޭގެ މިނިވަންކަމާއި ސިޔާދަތަށް އުނިކަން ލިބޭނެ ކަމެއް ކަމަށެވެ.

ސަރުކާރުގެ ބަޔާނުގެ މުހިންމު ނުކުތާތައް:

• އަސާސީ ސިޔާސަތު: ރާއްޖޭގެ ސަރަހައްދު ބެލެހެއްޓުން ބޭރުގެ އަސްކަރިއްޔާއަކަށް ނުދިނުމަކީ މި ސަރަހައްދުގެ ހަމަޖެހުމާއި ސަލާމަތަށްޓަކައި ދިވެހި ސަރުކާރުން ހިފަހައްޓަމުންދާ އަސާސީ ސިޔާސަތެކެވެ.

• ބޭރުގެ ނުފޫޒުތަކަށް ދައުވަތު ނުދިނުން: ދިވެހިރާއްޖޭގެ ސަރަހައްދުގެ އެއްވެސް ބައެއް ބޭރުގެ އަސްކަރީ ނުވަތަ ބެލެހެއްޓުމުގެ ބާރަކަށް ސަރުކާރުން ނުދޭނެ ކަމުގެ ޔަގީންކަން ދެމުން، ސީދާ ނުވަތަ ނުސީދާ ގޮތުން ވިޔަސް ބޭރުގެ ނުފޫޒުތަކަށް ދައުވަތު ނުދިނުމަށް ސަރުކާރުން ވަނީ އިލްތިމާސްކޮށްފައެވެ.

• ސްޓްރެޓިޖިކް މުހިންމުކަން: ޖޯގްރަފީ ގޮތުން ރާއްޖެ އޮތީ ސްޓްރެޓިޖިކް ގޮތުން ނުހަނު މުހިންމު ސަރަހައްދެއްގައި ކަމަށާއި، ރާއްޖޭގެ ކަނޑުއޮޅިތަކަކީ ދުނިޔޭގެ ތެލުގެ ވިޔަފާރިއާއި އާންމު ވިޔަފާރީގެ ބޮޑު އިންސައްތައެއް ދަތުރުކުރާ މުހިންމު މަގެއްކަން ސަރުކާރުން ފާހަގަކުރިއެވެ.

ސަރުކާރުން އިތުރަށް ބުނެފައިވަނީ، ރާއްޖޭގެ ކަނޑުގެ ސަރަހައްދު އަމާންކަމާއެކު ބޭނުންކުރުމުގެ ފުރުސަތު ބައިނަލްއަގުވާމީ މުޖުތަމައަށް ފަހިކޮށްދިނުމަކީ، ދުނިޔޭގެ ތެލުގެ އަދި އެހެނިހެން ވިޔަފާރިތަކަށް ރާއްޖެއިން ޒަމާނުއްސުރެ ކޮށްދެމުންދާ އަގުހުރި، އަދި ސަރަހައްދީ އަމާންކަމަށް ދެވޭ މުހިންމު ހިދުމަތެއް ކަމަށެވެ.