ރަސްމާލެ މަޝްރޫއުއާ މެދު އާންމު ވޯޓެއް ނެގުމަށް އެމްޑީޕީން ގޮވާލައިފި

ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް ދިނުމަށް ސަރުކާރުން ނިންމި ނިންމުމާ މެދު ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށް އިދިކޮޅު އެމްޑީޕީން ގޮވާލައިފިއެވެ.

އެމްޑީޕީން ނެރުނު ބަޔާނެއްގައި ބުނެފައިވަނީ، މި މުއާމަލާތާ ގުޅޭގޮތުން ސަރުކާރާއި އީގަލް ހިލްސްއިން ހާމަކޮށްފައިވާ މައުލޫމާތުތަކުގައި ފުށުއެރުންތަކެއް ހުރި ކަމަށާއި، ފުރިހަމަ ތަފްސީލު ހާމަކުރުމަށް ސަރުކާރުން ފަސްޖެހޭތީ ކަންބޮޑުވާ ކަމަށެވެ. އަދި ބިދޭސީންނަށް ރާއްޖޭގެ ބިން މިލްކުވާނެ ނުވަތަ ދާއިމީ މިލްކުވެރިކަމުގެ ހައްގެއް އުފަންވެދާނެ އެއްވެސް އިހުތިޔާރެއް ސަރުކާރަށް ނޯންނާނެ ކަމަށާއި، ގާނޫނުއަސާސީގައިވާ ގޮތުން އެފަދަ ނިންމުމެއް ނިންމޭނީ ސީދާ ރައްޔިތުންގެ ވޯޓަކުން ކަމަށް އެ ޕާޓީން ފާހަގަކުރިއެވެ.

ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވެސް ވަނީ ސިއްރު އެއްބަސްވުންތަކަށް އެމްޑީޕީގެ ސަރުކާރެއްގައިވެސް ޖާގަ ދީގެން ނުވާނެ ކަމަށް ވިދާޅުވެފައެވެ.

ސަރުކާރާއި އީގަލް ހިލްސްގެ ދިފާއު

އިދިކޮޅުގެ ކަންބޮޑުވުންތަކާ ގުޅިގެން ސަރުކާރުން ބުނެފައިވަނީ، މި މަޝްރޫއުގެ އަމަލީ މަސައްކަތް ފެށުމުގެ ކުރިންވެސް އެޑްވާންސްކޮށް 5,000 ހައުސިން ޔުނިޓް (ގާތްގަނޑަކަށް 500 މިލިއަން ޑޮލަރު) ދައުލަތަށް ލިބޭނެ ކަމަށެވެ. އަދި ލިބޭ ފައިސާ ޖަމާކުރާނީ ސަރުކާރުගේ ކޮންޓްރޯލް އޮންނަ އެސްކްރޯ އެކައުންޓަކަށް ކަމަށްވާތީ، ޑޮލަރުގެ ދަތިކަމަށް ބޮޑު ހައްލެއް ލިބިގެންދާނެ ކަމަށް ސަރުކާރުން ބުނެއެވެ. މީގެއިތުރުން، އެސްއީޒެޑް ނުވަތަ ޓޫރިޒަމް ގާނޫނުގެ ދަށުން އެއްވެސް ޓެކްސް ލުޔެއް ނުވަތަ ޑިއުޓީ އިނާޔަތެއް ދީފައި ނުވާނެ ކަމަށާއި ޓެކްސްތައް ފުރިހަމައަށް ދައުލަތަށް ލިބޭނެ ކަމަށް ސަރުކާރުން ކަށަވަރުކޮށްދެއެވެ.

އީގަލް ހިލްސްގެ ޗެއާމަން މުހައްމަދު އަލައްބާރު ވިދާޅުވީ، ރާއްޖޭގެ ތާރީހުގައިވެސް ހިންގާ އެންމެ ބޮޑު އިންވެސްޓްމަންޓް ކުރާ ކުންފުނީގެ ހައިސިއްޔަތުން ދިވެހިންގެ އިތުބާރު އެބިއޮތް ކަމަށާއި ރައްޔިތުން އެދޭ ގޮތަށް މަސައްކަތް ކުރިއަށްގެންދަވާނެ ކަމަށެވެ.