ދުބާއީ ފްލައިޓް ހައިޖެކް ކުރަން އުޅުނު މައްސަލައިގައި ބަންދުކުރި ދިވެހި ދެ ޕައިލެޓުން ރާއްޖެ ފޮނުވާލައިފި

ދުބާއީން އިޒްރޭލަށް ދަތުރުކުރި ފްލައިދުބާއީގެ ފްލައިޓް FZ1073 ގެ ކޮކްޕިޓް ތެރޭގައި ކޯ-ޕައިލެޓް، ބޯޓުގެ ކެޕްޓަނަށް ހަމަލާދީ ހައިޖެކްކުރަން އުޅުނު ހާދިސާގެ ތަހުގީގަށް ޔޫއޭއީގައި ހައްޔަރުކުރި ދިވެހި ދެ ޕައިލެޓުން މިއަދު ރާއްޖެ ފޮނުވާލައިފިއެވެ.

ފުލުހުންގެ މީޑިއާ އޮފިޝަލަކު މައުލޫމާތު ދެއްވި ގޮތުގައި، މިދިޔަ މަހުގެ 30 ވަނަ ދުވަހު ހިނގި މި ހާދިސާއާ ގުޅިގެން ޔޫއޭއީގެ ކަމާބެހޭ އިދާރާތަކުން ބަންދުކުރި ދެ ދިވެހިން ރާއްޖެ އައުމާ ގުޅިގެން، އެ މައްސަލައާ ގުޅޭ މައުލޫމާތު ސާފުކުރުމުގެ މަސައްކަތް ފުލުހުން ދަނީ ކުރަމުންނެވެ. ނަމަވެސް، އެ ދެ މީހުން ރާއްޖެއިން ހައްޔަރުކޮށްފައެއް ނުވެއެވެ.

ޔޫއޭއީގެ ބެލުމުގެ ދަށަށް ގެންދިޔަ ދެ ދިވެހިންނަކީ ފްލައިދުބާއީގައި ކޯ-ޕައިލެޓުންގެ ގޮތުގައި މަސައްކަތްކުރާ އަދި އިޒްރޭލަށް ދަތުރުކުރާ ދެ މީހުންނެވެ. މީގެއިތުރުން، އެ ދެ މީހުންނަކީ ކެޕްޓަނަށް "ކްރޭޝް ހެމާ" އިން ހަމަލާދިން ކޯ-ޕައިލެޓް ހައްމާމް އަލް ހަމާނީއާއެކު އެއް އިމާރާތެއްގައި ދިރިއުޅޭ ދެ މީހުންނެވެ. ނަމަވެސް، މި ހާދިސާއާ އެ ދެ ދިވެހިންނާ ސީދާ ގުޅެނީ ކިހިނެއްކަމެއް އަދި ސާފެއް ނުވެއެވެ.

އިޒްރޭލުގެ ގިނަ އަދަދެއްގެ ރައްޔިތުންނާއެކު ޖުމްލަ 182 ފަސިންޖަރުންނާއެކު ދަތުރުކުރި އެ ބޯޓުގެ ކޯ-ޕައިލެޓް، ކެޕްޓަނަށް ހަމަލާދީ ޒަހަމްކޮށްލުމުން ކެޕްޓަން ވަނީ ކޮކްޕިޓުގެ ދޮރު ހުޅުވާފައެވެ. އެއާއެކު، ފްލައިޓުގެ ކްރޫންނާއި ފަސިންޖަރުން ކޮކްޕިޓަށް ވަދެ ބޯޓުގެ ކޮންޓްރޯލް އަތުލައި، ކޯ-ޕައިލެޓް ހިފަހައްޓައި ބޯޓު ވަނީ ކުއްލި ހާލަތުގައި ސައޫދީ އަރަބިއްޔާގެ ތަބޫކް އެއާޕޯޓަށް ޖައްސާފައެވެ.

މި މައްސަލައާ ގުޅިގެން ފްލައިދުބާއީއިން ހިންގި އެތެރޭގެ ތަހުގީގަށްފަހު، އެ އެއާލައިންގެ ބައެއް މުވައްޒަފުން ވަޒީފާއިން ވަކިކުރަން ނިންމާފައިވާ ކަމަށް ބޭރުގެ ނޫސްތަކުން ރިޕޯޓްކޮށްފައިވެއެވެ.