ރަސްމާލޭގެ ޕްރޮޕަޓީތައް އިޒްރޭލު މީހުންނަށް ގަތުން މަނާވާނެ، އެހެން ދީންތަކަށް ފުރުސަތެއް ނޯންނާނެ: ރައީސް

ރަސްމާލޭގައި ތަރައްގީކުރާ "މޯލްޑިވްސް މެރީނާ އެންޑް ވޯޓާ ފްރޮންޓް" މަޝްރޫއުގެ ދަށުން އިޒްރޭލުގެ ރައްޔިތުންނަށް އެއްވެސް ތަނެއް ގަތުމާއި ހޯދުން ގާނޫނީ ގޮތުން މަނާވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް އޮފީހުގެ "ދަ ޕަލްސް" ޕޮޑްކާސްޓުގައި ވާހަކަފުޅު ދައްކަވަމުން، ރައީސް މުއިއްޒު ވަނީ ރަސްމާލެ މަޝްރޫއާ ގުޅިގެން އިދިކޮޅު ފަރާތްތަކުން ދައްކަމުންދާ ވާހަކަތަކަށް ރައްދު ދެއްވައި، މައިގަނޑު މުހިންމު ނުކުތާތަކެއް ހާމަކުރައްވާފައެވެ:

ޕްރޮޕަޓީތަކުގެ މިލްކުވެރިކަމާއި ދައުލަތުގެ ކޮންޓްރޯލް

• 99 އަހަރުގެ މުއްދަތު: ޔޫއޭއީގެ އީގަލް ހިލްސް އިން ރަސްމާލޭގައި ތަރައްގީކުރާ ޕްރޮޕަޓީތައް ގަންނަ ފަރާތްތަކަށް ދެނީ 99 އަހަރުގެ މުއްދަތަކަށެވެ. އެ މުއްދަތު ހަމަވުމުން، އެ ތަންތަން ވިއްކަންޖެހޭނީ ދިވެހި ދައުލަތަށެވެ.

• ދައުލަތުގެ ފުރިހަމަ ބާރު: މި ތަންތަނުގެ ފުރިހަމަ ކޮންޓްރޯލާއި އޮތޯރިޓީ އޮންނާނީ ދިވެހި ދައުލަތަށް ކަމަށާއި، ސަރުކާރަށް ނޭނގި އެހެން ފަރާތަކަށް އޯނާޝިޕް ބަދަލެއް ނުކުރެވޭނެއެވެ. މިއީ އޮޓޯއިން ރިނިއުވާ ގޮތަށް އޮތް ކަމެއް ނޫން ކަމަށްވެސް ރައީސް ފާހަގަކުރެއްވިއެވެ.

• ރިސޯޓުތަކުގެ އުސޫލު: މިހާރުވެސް ރާއްޖޭގެ ރަށްރަށް ރިސޯޓު ހިންގަން ދީފައިވަނީ 99 އަހަރަށް ކަމަށާއި، މުއްދަތު ހަމަވުމުން ކޮށްފައިވާ ހަރަދު ދީފައި ދައުލަތަށް ނެގުމުގެ ނުވަތަ މުއްދަތު އިތުރުކޮށްދިނުމުގެ އިހުތިޔާރު ދައުލަތަށް އޮންނަ ފަދައިން ރަސްމާލެ މަޝްރޫއުވެސް ހިންގަނީ އެ މިންގަނޑުންނެވެ.

އިޒްރޭލާއި ބިދޭސީންގެ އާބާދީގެ ހަގީގަތް

• އަރަބި އިސްލާމީ ގައުމުތަކުގެ ޝައުގުވެރިކަން: މިހާރުވެސް ޕްރޮޕަޓީ ގަތުމަށް މުޅިންހެން ޝައުގުވެރިކަން ފާޅުކުރަނީ ޖީސީސީ (GCC) އަދި މެދުއިރުމަތީގެ އަރަބި ގައުމުތަކުގެ ފަރާތްތަކުން ކަމަށްވާތީ، އެތަނުގައި ތިބޭނީ ދިވެހިންނާއި އަރަބި އިސްލާމުން ކަމަށް ރައީސް ވިދާޅުވިއެވެ.

• އިޒްރޭލަށް ފުރުސަތެއް ނެތުން: އިޒްރޭލު ޕާސްޕޯޓު މަނާކުރި ސަރުކާރަކުން އިޒްރޭލު މީހުން އާބާދުވާން ފުރުސަތު ދޭނެ ކަމަށް ބުނުމަކީ ދެކޮޅު ނުޖެހޭ "ބޭސްލެސް" ވާހަކައެއް ކަމަށާއި، ރިއަލް އެސްޓޭޓް ގާނޫނުގެ ބިލު މަޖިލީހަށް ހުށަހެޅުމުން އެކަން ސާފުވާނެ ކަމަށް ވިދާޅުވިއެވެ.

ދީނީ އަސާސްތަކާއި ގާނޫނުއަސާސީގެ ސިޔާދަތު

• ގާނޫނުއަސާސީ ހިނގުން: ރަސްމާލެއަކީ ދިވެހި ދައުލަތުގެ އިމުގެ ތެރޭގައި އޮތް ބިމަކަށްވާތީ، ދިވެހިރާއްޖޭގެ ގާނޫނުއަސާސީ އެތަނަށް ފުރިހަމައަށް ހިނގާނެއެވެ.

• އެހެން ދީންތަކަށް ޖާގައެއް ނެތް: ގާނޫނުއަސާސީގައިވާ ގޮތުން އިސްލާމްދީން ނޫން އެހެން ދީނެއްގެ އަޅުކަން ކުރުމާއި ދީނީ ކަންކަން ޕްރެކްޓިސް ކުރުމުގެ ފުރުސަތެއް ރަސްމާލޭގައި ނޯންނާނެއެވެ.

• މިސްކިތްތަކާއި ޚިދުމަތްތައް: ރިސޯޓުތަކާއި މާލެ ސަރަހައްދުގައި ގިނަ އަދަދެއްގެ ބިދޭސީން އުޅުނު ނަމަވެސް އެހެން ދީންތަކުގެ އަޅުކަންކުރާ ތަންތަން ނުހުންނަ ފަދައިން، ރަސްމާލޭގައިވެސް ހުންނާނީ މިސްކިތްތަކެވެ. އަދި އެތަނުގައި ދިވެހި ފުލުހުންގެ މަރުކަޒެއް ހުންނާނެއެވެ.

މަޝްރޫއުގެ މާލީ އަދި އިގުތިސާދީ ފައިދާ

• 5,000 ހައުސިންގ ޔުނިޓް އެޑްވާންސްކޮށް: ފުށިދިއްގަރުފަޅުން ހިއްކާ 500 ހެކްޓަރުގެ ބިމުގައި ހިންގާ މި މަޝްރޫއުގެ އަމަލީ މަސައްކަތް ފެށުމުގެ ކުރިންވެސް، އެޑްވާންސްކޮށް 5,000 ހައުސިންގ ޔުނިޓް (ގާތްގަނޑަކަށް 500 މިލިއަން ޑޮލަރު ނުވަތަ 7.7 ބިލިއަން ރުފިޔާ) ދައުލަތަށް ލިބޭނެއެވެ.

• އެސްކްރޯ އެކައުންޓް އަދި ޑޮލަރު: ޕްރޮޕަޓީތައް ވިއްކައިގެން ލިބޭ ފައިސާ ޖަމާވާނީ ސަރުކާރުގެ ކޮންޓްރޯލް އޮންނަ، ރާއްޖޭގައި ހުންނަ އެސްކްރޯ އެކައުންޓަކަށް ކަމަށްވާތީ، ޑޮލަރުގެ ދަތިކަމަށް ހައްލެއް ލިބި ރަސްމީ ރިޒާވް ވަރުގަދަވާނެއެވެ.

• ޓެކްސް އިނާޔަތެއް ނެތް: އެސްއީޒެޑް ނުވަތަ ޓޫރިޒަމް ގާނޫނުގެ ދަށުން އެއްވެސް ޑިއުޓީ އިނާޔަތެއް ނުވަތަ ޓެކްސް ލުޔެއް ދީފައި ނުވާނެ ކަމަށާއި، ޓީޖީއެސްޓީ އާއި އެހެނިހެން ޓެކްސްތައް ފުރިހަމައަށް ދައުލަތަށް ލިބޭނެއެވެ.