ރާއްޖެއިން ބޭނުންވެއްޖެނަމަ ސިއްހީ ދާއިރާގެ އިތުރު އެހީތެރިން ފޮނުވަން ތައްޔާރު: ޕާކިސްތާނުގެ ބޮޑުވަޒީރު

ރާއްޖޭގެ ސިއްހީ ދާއިރާގައި ޕާކިސްތާނުގެ 250 އަށްވުރެ ގިނަ ޑޮކްޓަރުންނާއި ފަންނީ ހިދުމަތްތެރިން މިހާރުވެސް މަސައްކަތް ކުރަމުންދާއިރު، ރާއްޖެއިން ބޭނުންވެއްޖެ ހިނދެއްގައި އެ އަދަދު އިތުރުކޮށްދިނުމަށް ތައްޔާރަށް ތިބިކަމަށް އެ ގައުމުގެ ބޮޑުވަޒީރު ޝެހްބާޒް ޝަރީފް މިއަދު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޕާކިސްތާނަށް ކުރައްވަމުންދާ ފުރަމާނަ ދަތުރުފުޅުގައި ދެ ބޭފުޅުން ދެއްވި ގުޅިފައިވާ ބަޔާނުގައި ބޮޑުވަޒީރު ޝެހްބާޒް ވަނީ، ދެ ގައުމުގެ މެދުގައި އޮތް ގާތް ގުޅުމާއި ސިއްހީ ދާއިރާއިން ލިބެމުންދާ އެހީތެރިކަމަށް އަލިއަޅުއްވާލައްވާފައެވެ:

1. ސިއްހީ ދާއިރާއާއި ތައުލީމީ އެހީތެރިކަން

ދިވެހި ދަރިވަރުން: ޕާކިސްތާނުގެ މެޑިކަލް ކޮލެޖުތަކާއި ޔުނިވާސިޓީތަކުގައި ގިނަ އަދަދެއްގެ ދިވެހި ދަރިވަރުން އަންނަނީ މަތީ ތައުލީމު ހާސިލުކުރަމުންނެވެ.
ސިއްހީ ހިދުމަތްތެރިން: މާލެއާއި އަތޮޅުތަކުގެ އެކި ސަރަހައްދުތަކުގައި ޕާކިސްތާނުގެ 250 އަށްވުރެ ގިނަ ޑޮކްޓަރުން ހިދުމަތްކުރައްވަމުން ދާއިރު، ރާއްޖެއިން އެދެފިނަމަ އިތުރު ސިއްހީ ހިދުމަތްތެރިން ފޮނުވަން ޕާކިސްތާނުން އޮތީ ތައްޔާރަށެވެ.
ޚާއްސަ އެއްބަސްވުންތައް: މިއަދު ސޮއިކުރި 20 އެމްއޯޔޫގެ ތެރޭގައި ސިއްހީ ހިދުމަތްތެރިންގެ ވަޒީފާއާ ގުޅޭ އެމްއޯޔޫއަކާއި ސިއްހީ ދާއިރާއިން އެއްބާރުލުން ދިނުމުގެ އެއްބަސްވުމެއް ހިމެނެއެވެ.

2. ތިމާވެއްށީގެ މަޝްރޫއަށް ހަދިޔާއެއް

ސަރުކާރުން ފަށާފައިވާ 5 މިލިއަން ގަސް އިންދުމުގެ މަޝްރޫއަށް އެހީތެރިވުމުގެ ގޮތުން، ޕާކިސްތާނުން ވަނީ އެކި ބާވަތުގެ 100,000 ގަހުގެ އޮށާއި 100,000 ގަސް (އޮލިވް ކަޓިންސް) ރާއްޖެއަށް ހަދިޔާކުރަން ނިންމާފައެވެ.

3. ފަންނީ އެހީތެރިކަމާއި އިގުތިސާދީ އަމާޒު

ފަންނީ އެހީ: މިއަދު ސޮއިކުރެވުނު އެމްއޯޔޫތަކާ ގުޅޭ ތަރައްގީގެ މަޝްރޫއުތައް ކުރިއަށްގެންދިއުމަށް ބޭނުންވާ ފަންނީ އެހީތެރިކަން ފޯރުކޮށްދިނުމަށް ޕާކިސްތާނުން ވަނީ އެއްބަސްވެފައެވެ.
ވިޔަފާރީގެ އަމާޒު: މިހާރު ދެ ގައުމުގެ މެދުގައި ކުރެވޭ 13.9 މިލިއަން ޑޮލަރުގެ ވިޔަފާރި، ކުރިއަށް އޮތް 2 އަހަރު ތެރޭގައި 200 މިލިއަން ޑޮލަރަށް އިތުރުކުރުމަށް ދެ ގައުމުން ވަނީ ނިންމާފައެވެ.

މިއީ ފާއިތުވި 11 އަހަރު ދުވަހުގެ ތެރޭގައި ރާއްޖޭގެ ރައީސަކު ޕާކިސްތާނަށް ކުރައްވާ ފުރަތަމަ ރަސްމީ ދަތުރުފުޅެވެ.