ރައީސް މުއިއްޒު އަރިހުގައި ކަޝްމީރު މައްސަލައާއި އިންޑަސް މުއާހަދާގެ ވާހަކަ ދައްކަވައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޕާކިސްތާނަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން، އެ ގައުމުގެ ބޮޑުވަޒީރު ޝެހްބާޒް ޝަރީފާއެކު ބޭއްވެވި ރަސްމީ ބައްދަލުކުރެއްވުމުގައި އިންޑިއާއާއި ޕާކިސްތާނުގެ މަސްލަހަތު ހިމެނޭ ސަރަހައްދީ މުހިންމު ކަންތައްތަކާ ގުޅޭގޮތުން ވާހަކަދެއްކެވިކަން ބޮޑުވަޒީރު ޝެހްބާޒް ހާމަކުރައްވައިފިއެވެ.

ދެ ގައުމުގެ ދެމެދުގައި ސޮއިކުރެވުނު އެއްބަސްވުންތަކަށްފަހު ދެއްވި ގުޅިފައިވާ ބަޔާނުގައި ބޮޑުވަޒީރު ޝަރީފް ވަނީ އެ މަޝްވަރާތަކުގެ ތަފްސީލުތަކަށް އަލިއަޅުއްވާލައްވާފައެވެ.

އެގޮތުން އިންޑިއާގެ ބެލުމުގެ ދަށުގައިވާ ޖައްމޫ އާއި ކަޝްމީރާ މެދު ޕާކިސްތާނުން ގެންގުޅޭ އަސާސީ ސިޔާސަތާ ގުޅޭ މައުލޫމާތު ރައީސް މުއިއްޒަށް އެރުވިކަމަށް ޝަރީފް ވިދާޅުވިއެވެ. އަދި އދ. ގެ ސަލާމަތީ މަޖިލީހުގެ ގަރާރުތަކާ އެއްގޮތަށް، ކަޝްމީރުގެ ރައްޔިތުން އަމިއްލަ މުސްތަގުބަލު ނިންމުމުގެ ހައްގު ހާސިލުކުރަންދެން ސިޔާސީ ގޮތުންނާއި ބައިނަލްއަގުވާމީ މަންސަތަކުގައި ޕާކިސްތާނުން އެއްބާރުލުން ދިނުމުގައި ދެމިއޮންނާނެ ކަމަށް ވިދާޅުވިއެވެ.

1960 ވަނަ އަހަރު ވޯލްޑް ބޭންކު މެދުވެރިވެގެން އިންޑިއާއާއި ޕާކިސްތާނާ ދެމެދު ސޮއިކުރި އިންޑަސް ކޯރުގެ ފެން ބެހުމުގެ ތާރީޚީ މުއާހަދާއަށް އަމަލުކުރުން މެދުކަނޑާލަން އިންޑިއާއިން ނިންމި ނިންމުމާމެދު އިންތިހާއަށް ކަންބޮޑުވާކަން ޝަރީފް ހާމަކުރެއްވިއެވެ. ގާނޫނީ ގޮތުން ބަނދެވިފައިވާ ބައިނަލްއަގުވާމީ މުއާހަދާއަކާ ހިލާފަށް ކުރާ ކޮންމެ ކަމެއް ޕާކިސްތާނުން ބަލާނީ ސީދާ ހަނގުރާމައިގެ އަމަލެއްގެ ގޮތުގައި ކަމަށް ބޮޑުވަޒީރު ވިދާޅުވިއެވެ.

އިންޑިއާއަށް ފާޑުވިދާޅުވެ ޕާކިސްތާނުގެ ބޮޑުވަޒީރު ދެއްކެވި ވާހަކަފުޅުތަކާ ގުޅޭގޮތުން ރައީސް މުއިއްޒު ވަކި އެއްޗެއް ވިދާޅެއް ނުވެއެވެ. އެމަނިކުފާނު ހަމައެކަނި ފާހަގަކުރެއްވީ ސާކް ޖަމާއަތުގެ މަސައްކަތްތައް އަލުން ފެށުމަށްޓަކައި ސަރަހައްދުގެ ހުރިހާ ގައުމުތަކާއެކު ގުޅިގެން މަސައްކަތްކުރަން ރާއްޖެ ތައްޔާރަށް އޮތް ކަމަށެވެ.

ރައީސް މުއިއްޒުގެ ވެރިކަމުގެ ފުރަތަމަ ދުވަސްވަރު އިންޑިއާއާ ގުޅުން ގޯސްވި ނަމަވެސް، ފަހުން މަޝްވަރާގެ އުސޫލުން އިންޑިއާއާއެކު އޮތް ގުޅުން ވަނީ ބަދަހިކޮށްފައެވެ. އަދި ޕާކިސްތާނުގައި މި މަޝްވަރާތައް ކުރިއަށްދިޔައިރު، އިންޑިއާއިން ވަނީ ރާއްޖެއަށް ދޫކޮށްފައިވާ ކަރަންސީ ސްވޮޕްގެ ފައިސާ އަނބުރާ ދެއްކުމުގައި ބޮޑެތި ލުއިތަކެއް ދީފައެވެ.