ދޮގު މައުލޫމާތާއި ފިތުނަ ފެތުރުން ހުއްޓާލުމަށް އެމްއެމްބީސީން އިލްތިމާސްކޮށްފި

މީޑިއާތަކުން ދޮގު މައުލޫމާތު ފެތުރުމާއި ފިތުނަ އުފެދޭ ފަދަ އަމަލުތަކުން ދުރުހެލިވުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން އިލްތިމާސްކޮށްފި އެވެ.

ރާއްޖޭގެ ބްރޯޑްކާސްޓިން ދުވަހުގެ މުނާސަބަތުގައި އެމްއެމްބީސީން ނެރުނު ބަޔާނެއްގައި ވަނީ، ގައުމީ މަސްލަހަތު އިސްކޮށް، ޒިންމާދާރުކަމާއެކު ތެދު މައުލޫމާތު ފެތުރުމަށް ހުރިހާ ބްރޯޑްކާސްޓަރުންނަށް ގޮވާލާފައެވެ. އަދި ބްރޯޑްކާސްޓިން ދާއިރާ ތަރައްގީކޮށް، މަސައްކަތްތެރިންގެ ހައްގުތައް ރައްކާތެރިކުރުމަށް ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެ ކަމުގެ ޔަގީންކަންވެސް ކޮމިޝަނުން ވަނީ ދީފައެވެ.

އެ ބަޔާނުގައި ފާހަގަކޮށްފައިވާ ގޮތުގައި، 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ފެށުނު މި ހިދުމަތަކީ އިސްލާމީ އަހުލާގާއި ދިވެހި ގައުމިއްޔަތު ދަމަހައްޓައި، އިޖުތިމާއީ އަދި ސިޔާސީ ހޭލުންތެރިކަން އިތުރުކުރުމުގައި މުހިންމު ދައުރެއް އަދާކުރަމުން އަންނަ ހިދުމަތެކެވެ.

ރާއްޖޭގެ ބްރޯޑްކާސްޓިން ތާރީޚުގެ މުހިންމު ހަމަތައް:

• 1960-1980: ސެނެކޯ ރޭޑިއޯ، އެމްއައިބީއެސް (1967)، ރޭޑިއޯ މޯލްޑިވްސް (1969) އަށްފަހު 1980 ގައި "ދިވެހިރާއްޖޭގެ އަޑު" ގެ ނަމުގައި ހިދުމަތް ފުޅާވި.

• 1978 & 2007: 1978 ގައި ޓީވީއެމް އުފެއްދިއިރު، 2007 ގައި އަމިއްލަ ފަރާތްތަކަށް ބްރޯޑްކާސްޓްކުރުމުގެ ފުރުސަތު ހުޅުވާލި.

• 2010: ބްރޯޑްކާސްޓްކުރުމުގެ ގާނޫނާއެކު ހާއްސަ ގާނޫނީ އޮނިގަނޑެއް ގާއިމުވި.

• މިދިޔަ އަހަރުގެ ސެޕްޓެމްބަރު 18: މީޑިއާ އަދި ބްރޯޑްކާސްޓިން ރެގިއުލޭޝަން ގާނޫނުގެ ދަށުން އެމްއެމްބީސީ އުފެދި، އާ ދައުރެއް ފެށުނު.

އެމްއެމްބީސީން ހާމަކުރި ގޮތުގައި މިހާރު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ހިދުމަތް ދެމުންދެއެވެ. އަދި ޓެކްނޮލޮޖީއަށް އަންނަ ބަދަލުތަކާއެކު ދާއިރާގެ ފެންވަރު މަތިކޮށް، ފަންނީ ތަމްރީނު ދިނުމާއި، މިނިވަން އަދި ޒިންމާދާރު ނޫސްވެރިކަމުގެ ވެއްޓެއް ގާއިމުކުރުމަށް އަބަދުވެސް މަސައްކަތް ކުރާނެ ކަމަށް އެ ކޮމިޝަނުން ބުންޏެވެ.