ފްލައި ދުބާއީ ހާދިސާގައި ދެ ދިވެހިންނަށް ތުހުމަތު، ޔޫއޭއީ ފުލުހުންގެ ބެލުމުގެ ދަށަށް

174 ފަސިންޖަރުންނާއެކު ދުބާއީން ފުރައިގެން އިސްރާއީލަށް ދަތުރުކުރި ފްލައި ދުބާއީގެ ފްލައިޓެއްގެ ކޮކްޕިޓް ތެރޭގައި ކޯ-ޕައިލެޓް މަރުތޭލަކުން ހަމަލާދީ ބޯޓު ވައްޓާލަން އުޅުމުން، ފަސިންޖަރުންނާއި ކްރޫން ގުޅިގެން ބޯޓުގެ ކޮންޓްރޯލް ހޯދައި ބޯޓު ސަލާމަތްކޮށްފިއެވެ. މިއާއެކު މި ޓެރަރިސްޓް ހަމަލާއާ ގުޅުންހުރި ކަމުގެ ތުހުމަތުގައި ޔުނައިޓެޑް އަރަބް އެމިރޭޓްސް (ޔޫއޭއީ) އިން މިހާރު ވަނީ ދެ ދިވެހިން ހައްޔަރުކޮށްފައެވެ.

ބުދަ ދުވަހު ހިނގި މި ނުރައްކާތެރި ހާދިސާގައި، ފްލައިޓް ނަންބަރު FZ1073 ގެ ކޯ-ޕައިލެޓް ހައްމާމް އަލް ހަމާނީ ވަނީ ކުއްލި ގޮތަކަށް ކެޕްޓަނަށް ހަމަލާދީފައެވެ. މި ހަމަލާއާއެކު ބޯޓު ކުއްލިއަކަށް ތިރިވާން ފެށި ނަމަވެސް، ބޯޓުގައި ތިބި ފަސިންޖަރުންނާއި، ކްރޫން އަދި އޮފް-ޑިއުޓީގައި ތިބި އެހެން ޕައިލެޓުންތަކެއް ވަނީ ކޮކްޕިޓަށް ވަދެ، ހަމަލާދިން ކޯ-ޕައިލެޓް ހިފަހައްޓައި ބޯޓުގެ ކޮންޓްރޯލް އަނބުރާ ހޯދާފައެވެ.

މި މައްސަލައިގައި ރޭ ޔޫއޭއީން ހައްޔަރުކުރި ދެ ދިވެހިންނަކީ ހަމަލާދިން ކޯ-ޕައިލެޓް ހައްމާމްއާ ގުޅުން އޮންނަ ބައެއް ކަމަށް މައުލޫމާތު ލިބެއެވެ. މި ދެ މީހުންނަކީވެސް ވަރަށް ފަހުން ފްލައި ދުބާއީއާ ގުޅިފައިވާ، އެ އެއާލައިންގެ ދެ ކޯ-ޕައިލެޓުންނެވެ. އެހެންނަމަވެސް އެމީހުންގެ މައްޗަށް ކުރަނީ ސީދާ ކޮން ތުހުމަތެއްކަން އަދި ސާފެއް ނުވެއެވެ.

ބޯޓު ހައިޖެކް ކުރަން އުޅޭކަމުގެ ސިގްނަލް (7500) ދިނުމަށްފަހު ފްލައިޓް ވަނީ ސައުދީ އަރަބިއްޔާގެ ތަބޫކްގައި ހުންނަ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ސަލާމަތްތެރިކަމާއެކު ޖައްސާފައެވެ.

ގިނަ އަދަދެއްގެ އިސްރާއީލު ރައްޔިތުން ތިބި މި ފްލައިޓުގެ ފަސިންޖަރުން ބަލާ އިސްރާއީލުގެ އަސްކަރީ ބޯޓުތަކެއް ފޮނުވަން ހުއްދައަށް އެދުމުން، ރަސްމީ ޑިޕްލޮމެޓިކް ގުޅުން ނެތުމުގެ ސަބަބުން ސައުދީން ވަނީ އެ ހުއްދަ ދިނުމަށް ދެކޮޅު ހަދާފައެވެ. އެހެންކަމުން، ފަސިންޖަރުން އަނބުރާ ގެންދިއުމަށްޓަކައި ފްލައި ދުބާއީން ވަނީ އެހެން މަތިންދާބޯޓެއް ތަބޫކް އެއާޕޯޓަށް ފޮނުވާފައެވެ. އަދި ބުދަ ދުވަހުގެ ހަވީރުގެ ވަގުތެއްގައި ފަސިންޖަރުން ވަނީ އެ ބޯޓުގައި އިސްރާއީލަށް ދިއުމަށް ފުރާފައެވެ.