109 އަހަރުގެ ޖަލު ހުކުމެއް އިއްވާފައިވާ ޝިފާއު ގޭބަންދަށް ބަދަލުކޮށްފި

ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކަކަށް އޮޅުވާލައިގެން މުދާ ހޯދި މައްސަލައިގައި 109 އަހަރުގެ ޖަލު ހުކުމެއް އިއްވާފައިވާ ހުސައިން ޝިފާއު ސިއްހީ މައްސަލައަކާ ގުޅިގެން ވަގުތީ ގޮތުން ގޭބަންދަށް ބަދަލުކޮށްފިއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން މައުލޫމާތު ދެއްވި ގޮތުގައި، ޖަލުތަކާ ބެހޭ ގާނޫނުގެ ދަށުން ޖަލުގައި އޮވެގެން ބޭސްފަރުވާ ނުކުރެވޭ ހާލަތްތަކުގައި ނުވަތަ ޑޮކްޓަރުންގެ ލަފާގެ މަތިން މީހުން ވަގުތީ ގޮތުން ގޭބަންދަށް ބަދަލުކުރުމުގެ ފުރުސަތު އޮވެއެވެ.

އެގޮތުން ޝިފާއު މިހާރު ގޭބަންދަށް ބަދަލުކޮށްފައިވަނީ 1 މަސްދުވަހުގެ މުއްދަތަށެވެ. އަދި އެ މުއްދަތުގެ ތެރޭގައި ސިއްހީ ހާލަތު ރަނގަޅުނުވާނަމަ އިތުރު 2 މަސްދުވަސް ދެވޭނެކަމަށް މިނިސްޓަރު ވިދާޅުވިއެވެ. އޭނާ ގޭބަންދަށް ބަދަލުކުރުމަށް ކަނޑައެޅިފައިވާ ޝަރުތުތަކާ ހިލާފުވެއްޖެނަމަ، ވަގުތުން އަނބުރާ ޖަލަށް ބަދަލުކުރެވޭނެއެވެ.

މައްސަލައިގެ ފަސްފަހަތާއި ހުކުމް

ސައްހަ ނޫން ޓީޓީތަކެއް ފޮނުވައިގެން 1.9 މިލިއަން ރުފިޔާގެ މުދާ ހޯދި މައްސަލައިގައި ޝިފާއު 2023 ވަނަ އަހަރު ހައްޔަރުކޮށް، އޭނާގެ މައްޗަށް ދައުލަތުން 23 ދައުވާއެއް ކުރިއެވެ. އެ ދައުވާތައް ސާބިތުވެ، ކްރިމިނަލް ކޯޓުން މިދިޔަ އަހަރުގެ ޑިސެމްބަރު މަހު އޭނާގެ މައްޗަށް 109 އަހަރުގެ ޖަލު ހުކުމެއް އަދި 7 މިލިއަން ރުފިޔާގެ ޖޫރިމަނާއެއް އިއްވިއެވެ.

ޝިފާއުގެ މައްޗަށް އިއްވާފައިވާ ހުކުމްތަކުގެ ތަފްސީލު:

• މަނީ ލޯންޑްރިންގ (7 ދައުވާ): 70 އަހަރުގެ ޖަލު ހުކުމް

• މަކަރާއި ހީލަތް ހެދުން (7 ދައުވާ): 30 އަހަރުގެ ޖަލު ހުކުމް

• ސައްހަ ނޫން ލިޔުން ދިނުން (9 ދައުވާ): 9 އަހަރުގެ ޖަލު ހުކުމް

މިއީ ރާއްޖޭގެ ތާރީޚުގައި އެކަކުގެ މައްޗަށް އިއްވި ދެވަނައަށް އެންމެ ދިގު ޖަލު ހުކުމެވެ.

މި މައްސަލައިގައި ދައުލަތާއެކު އިއުތިރާފުގެ އެއްބަސްވުމެއް ހެދި ނަމަވެސް، ކަން ހިނގާފައިވާ ގޮތަށް ރިއާޔަތްކޮށް އެ އެއްބަސްވުން ބަލައިނުގަތުމަށް ކޯޓުން ނިންމިއެވެ. މީގެ އިތުރުން، 2023 ގައި ކޯޓުން ދޫކޮށްލުމުން އޭނާ ރާއްޖެއިން ބޭރަށް ދިއުމާ ގުޅިގެން އިންޓަޕޮލް ރެޑް ނޯޓިސް ނެރެފައިވަނިކޮށް، އެނބުރި ރާއްޖެ އައުމުން އަލުން ވަނީ ހައްޔަރުކޮށްފައެވެ.