"އުޅަނދުތަކުން ނަގާ ފީ ޚަރަދުކުރާނީ މަގުތަކާއި ޓްރެފިކް މައްސަލަ ހައްލު ކުރަން"

އަލަށް އމަލުކުރަން ފެށި އެއްގަމު ދަތުރުފަތުރުގެ ޤާނޫނުގެ ދަށުން އުޅަނދުތަކުން ނަގާ ފީތައް މެނޭޖުކުރުމަށް ޚާއްޞަ ފަންޑެއް ޤާއިމުކޮށް، އެ ފައިސާ ސީދާ މާލޭގެ ޓްރެފިކް މައްސަލަތައް ޙައްލުކުރުމަށާއި މަގުތައް މަރާމާތުކުރުމަށް ޚަރަދުކުރެވޭނެކަމުގެ ފުރިހަމަ ޔަޤީންކަން ބަންޑާރަނައިބު އަޙްމަދު އުޝާމް ދެއްވައިފިއެވެ.

ބަންޑާރަނައިބު މިކަން ހާމަކުރެއްވީ، ދައުލަތުގެ ވުޒާރާތަކުގެ މަސައްކަތްތަކާ ގުޅޭގޮތުން މަޢުލޫމާތު ދިނުމަށް ކުރިއަށްގެންދާ "އަހާ" ފޯރަމްގައި އާންމު ރައްޔިތަކު ކުރި ސުވާލަކަށް ޖަވާބުދެއްވަމުންނެވެ.

މިދިޔަ ބުރާސްފަތި ދުވަހު އަމަލުކުރަން ފެށި އައު ޤާނޫނުގައިވާ ގޮތުން، މާލެ ސަރަހައްދުގައި ރަޖިސްޓްރީކުރާ އުޅަނދުތަކުން ނަގާ ފީ ސިޓީ ކައުންސިލަށް ދޭން ނުޖެހޭނެ އެވެ. މިކަމާ ގުޅިގެން މާލޭގެ މޭޔަރު އާދަމް އާޒިމް ވަނީ، މިއީ ކައުންސިލްގެ ބާރުތައް ސަރުކާރަށް ނެގުންކަމަށް ސިފަކުރައްވައި ފާޑުވިދާޅުވެފައެވެ.

އެ ފާޑުކިޔުންތަކަށް ރައްދުދެއްވަމުން ބަންޑާރަނައިބު ވިދާޅުވީ، އުޅަނދުތަކުން ފީ ނެގުމުގެ އެންމެ ބޮޑު މަޤުޞަދަކީ އެ އުޅަނދެއް ރަޖިސްޓްރީކޮށްފައިވާ ރަށެއްގެ ޓްރެފިކް މައްސަލަތައް ޙައްލުކުރުމަށް ޚަރަދުކުރުން ކަމަށެވެ. ނަމަވެސް، މީގެ ކުރިން މާލޭގައި ރަޖިސްޓްރީކުރާ އުޅަނދުތަކުން ނަގާ ފީ ކައުންސިލަށް ޖަމާވި ނަމަވެސް، މަގުތައް މަރާމާތުކުރުމަށާއި ޓްރެފިކް މައްސަލަތައް ޙައްލުކުރުމަށް އޭގެ ބޮޑު ބައެއް ބޭނުންކޮށްފައި ނުވާކަން މަގުމަތިން ވަރަށް ސާފުކޮށް ފެންނަން އޮތްކަމަށް އޭނާ ފާހަގަކުރެއްވިއެވެ.

"އެ ފައިސާ މާލެ ސިޓީ ކައުންސިލުން މިއޮތް ހުރިހާ ދުވަހު ބޭނުންކުރަމުންދިޔައީ އެކަމަކަށް (ޓްރެފިކް މައްސަލަތައް ހައްލުކުރަން) ނޫން،" އުޝާމް ވިދާޅުވިއެވެ.

ބަންޑާރަނައިބު ވިދާޅުވީ އައު ޤާނޫނުގެ ދަށުން އުޅަނދުތަކުން ނަގާ ފީތައް ދެން ޖަމާކުރެވޭނީ ވަކި ޚާއްޞަ ފަންޑަކަށް ކަމަށާއި، އެ ފަންޑު ބަލަހައްޓާނީ ވަޒީރުން ހިމެނޭހެން އެކުލަވާލެވޭ 'ރޯޑް ސޭފްޓީ ކައުންސިލް' އިން ކަމަށެވެ. އެހެންކަމުން، އެ ފައިސާ އެންމެ ރަނގަޅު ގޮތުގައި، ރައްޔިތުންނަށް އޭގެ މަންފާކުރާނެ ގޮތަކަށް ޚަރަދުކުރެވިގެންދާނެކަމުގެ ޔަޤީންކަން އެބައޮތްކަމަށް ބަންޑާރަނައިބު ވިދާޅުވިއެވެ.