ވިޒިޓް މޯލްޑިވްސް އިޔާ ފާހަގަ ކުރަން ލޯގާ ތައާރަފުކޮށްފި

މެދުއިރުމަތީގެ ހަނގުރާމައާއި ބައިނަލްއަޤްވާމީ ދަތުރުފަތުރުގެ ދާއިރާއަށް ކުރިމަތިވި ބޮޑެތި ގޮންޖެހުންތަކާ އެކުވެސް، ރާއްޖޭގެ ފަތުރުވެރިކަން އެ ހުރަސްތައް ގިރާކޮށް ކުރީގެ އޮތް ހާލަތަށް ވާސިލުވަމުން އަންނަ ކަމަށާއި، 2027 ވަނަ އަހަރަކީ "ވިޒިޓް މޯލްޑިވްސް އިޔަރ" ގެ ގޮތުގައި ފާހަގަކުރުމަށް ސަރުކާރުން ނިންމަވައިފިކަން ފަތުރުވެރިކަމާ ބެހޭ ވަޒީރު މުޙައްމަދު އަމީން އިޢުލާންކުރައްވައިފިއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ރޭ ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ، މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖެއަށް 1.57 މިލިއަން ފަތުރުވެރިން ޒިޔާރަތްކޮށްފައިވާ ކަމަށެވެ. އަދި މިދިޔަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހު ރާއްޖެ އައި ފަތުރުވެރިންގެ ޢަދަދު އިތުރުވެފައިވުމަކީ، ރާއްޖެއަށް އޮތް ޑިމާންޑާއި އުންމީދު ހާމަކޮށްދޭ ކަމެއްކަމުގައި އެމަނިކުފާނު ފާހަގަކުރެއްވިއެވެ.

ފަތުރުވެރިކަން އިތުރަށް ސިންދަފާތުކޮށް ފުޅާކުރުމަށްޓަކައި، 2027 ވަނަ އަހަރަކީ "ވިޒިޓް މޯލްޑިވްސް އިޔަރ" ގެ ގޮތުގައި ކަނޑައަޅައި، އެއީ އެންމެންގެ ޝާމިލުވުން އޮންނަ ޤައުމީ ބޮޑު ކެމްޕޭނަކަށް ހެދުމަށް ވަނީ ނިންމާފައެވެ. ވަޒީރު ވިދާޅުވި ގޮތުގައި މިއީ 2040 ވަނަ އަހަރާ ހަމައަށް ދާންވާއިރަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ކުރާ މަސައްކަތުގެ މުހިންމު ބައެކެވެ. މީގެ އިތުރުން މިއީ ފަތުރުވެރިކަމުގެ ސިނާޢަތުން ހޯދާފައިވާ ބައިނަލްއަޤްވާމީ ވާދަވެރިކަމުގެ ތެރޭގައި ރާއްޖޭގެ މަޤާމު އިތުރަށް ހަރުދަނާކޮށް، އިޤްތިޞާދަށް އޭގެ ނަފާ ހޯދައިދިނުމަށް ލިބޭނެ މުހިންމު ފުރުސަތެއްކަންވެސް އޭނާ ފާހަގަކުރެއްވިއެވެ.

ދާއިރާގެ ކުރިއެރުމަށް ބޮޑެތި އަމާޒުތަކެއް ކަނޑައަޅައި މަސައްކަތްކުރަމުންދާއިރު، އިންޑަސްޓްރީގެ ކަންބޮޑުވުންތަކަށް ސަރުކާރުން އަވަސް ހައްލުތަކެއް ހޯދައިދެމުންދާކަންވެސް ވަޒީރު ރޭ ވަނީ ފާހަގަކުރައްވާފައެވެ.

އެގޮތުން، އޮފްޝޯ ބުކިން ޕްލެޓްފޯމްތަކާއި ޓުއަރ އޮޕަރޭޓަރުންނާއި ޓްރެވަލް އެޖެންޓުންގެ އަތުން ޓީޖީއެސްޓީ ނަގާ ގޮތަށް (ޑެސްޓިނޭޝަން ޕްރިންސިޕަލްގެ އުސޫލުން) ވޭތުވެދިޔަ ދެ މަހެއްހާ ދުވަހުގެ ތެރޭގައި ޤާނޫނަށް ގެނައި ބަދަލުތަކާ ގުޅިގެން އިންޑަސްޓްރީން ފާޅުކުރި ކަންބޮޑުވުންތަކަށް ޙައްލު ހޯދައިދިނުމަށްޓަކައި، އެ ޤާނޫނަށް އިތުރު އިޞްލާޙުތަކެއް ވަރަށް އަވަހަށް ގެންނަވަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާކަން އަމީން އިޢުލާންކުރެއްވިއެވެ.

އެ ބަދަލާއެކު ބޭރުގެ ޓްރެވެލް އެޖެންޓުންނާއި ޓުއަރ އޮޕަރޭޓަރުންގެ އަތުން ދައުލަތަށް އަހަރަކު 1.6 ބިލިއަން ރުފިޔާ އިތުރަށް ލިބޭނެކަމަށް ލަފާކޮށްފައި އޮތް ނަމަވެސް، އެ ބަދަލުތަކުގެ ސަބަބުން ޔޫރަޕްގެ ބައެއް ޓުއަރ އޮޕަރޭޓަރުން ރާއްޖެއަށް ބުކިން ހެދުން ވަގުތީގޮތުން މެދުކަނޑާލާފައިވާކަން ވަނީ ފާހަގަކުރެވިފައެވެ.

ވަޒީރު ވިދާޅުވީ ޤާނޫނަށް އަލުން ގެންނަ ބަދަލުތަކަކީ މިފަދަ ދަތިތަކާއި، ޓެކްސް ދެއްކުމަށް ކަނޑައެޅިފައިވާ މުއްދަތުތަކާ ގުޅޭގޮތުން އިންޑަސްޓްރީގެ އިސް ފަރާތްތަކުން ރައީސްއަށް ހުށަހެޅި ޝަކުވާތަކަށް ރިޢާޔަތްކޮށް ގެންނަ ބަދަލުތަކެއް ކަމަށެވެ. ރާއްޖޭގެ ފަތުރުވެރިކަމަށް 54 އަހަރު ފުރިފައިވާއިރު، މިހާ ހިސާބަށް އާދެވިފައިވަނީ މި ދާއިރާގައި މަސައްކަތްކުރާ ފަރާތްތަކުގެ ވަރަށް ބޮޑު ޤުރުބާނީއަކާއި ބުރަ މަސައްކަތުން ކަމަށްވެސް މިނިސްޓަރު އަމީން ރޭގެ ރަސްމިއްޔާތުގައި ވިދާޅުވިއެވެ.