ޝުޖާއު ޔާމީނަށް ހަނދާންކޮށްދިނީ ބިން މިލްކުރެވޭ ގޮތް ހެދި ދުވަސް

އީގަލްސް ހިލްސް އިން ރަސްމާލޭގައި ހިންގާ މަޝްރޫއަށް ކުރީގެ ރައީސް އަބްދުﷲ ޔާމީން ފާޑުވިދާޅުވެ އެކަމާ ދެކޮޅަށް ތެދުވެވަޑައިތުމުން އެމަނިކުފާނުގެ ވެރިކަމުގައި ބޭރު ފަރާތްތަކަށް ބިން މިލްކު ކުރެވޭ ގޮތަށް ގާނޫނުއަސާސީ ބަދަލުކުރެއްވި ދުވަސް ހަނދާން ކޮށްދީފި އެވެ.

ޕީއެންއެފްގެ ފްރަންޓް އޮފީސް ޖަލްސާގައި ވާހަކަ ދައްކަވަމުން ޔާމީން ވިދާޅުވީ އެއީ ރާއްޖެ އަށް އެއްވެސް ފައިދާއެއް ކުރާނެ މަޝްރޫއެއް ނޫން ކަމަށާއި ވެރިކަން ލިބިވަޑައިގެންފި ނަމަ އެ މަޝްރޫއު ހުއްޓުވާނެ ކަމަށެވެ. އެ މަޝްރޫއާ ދެކޮޅުވާ މައިގަނޑު ސަބަބެއް ކަމަށް ޔާމީން ވިދާޅުވީ ބޭރު ފަރާތްތަކަށް 99 އަހަރަށް ބިން ކުއްޔަށް ދިނުމެވެ. ޔާމީން ވިދާޅުވީ އެއީ އުމުރު ދުވަހަށް ދިނުން ކަމަށާއި އޭގެން ދިވެހިން ސަލާމަތް ނުވެވިގެން އުޅެން ޖެހޭނެ ކަމަށެވެ.

އެކަމަށް ރައްދު ދެއްވައި ޕީއެންސީގެ ނައިބު ރައީސް އަދި ބާރަށު ދާއިރާގެ މެންބަރު އިބްރާހިމް ޝުޖާއު އެކްސްގައި ވަނީ ޔާމީންގެ ވެރިކަމުގައި ބޭރު ފަރާތްތަކަށް ބިން މިލްކު ކުރެވޭ ގޮތަށް ގާނޫނުއަސާސީ އަށް ގެނައި އިސްލާހު އެމަނިކުފާނު ތަސްދީގު ކުރެއްވުމަށް ދެއްކެވި ވާހަކައިގެ ވީޑިއޯއެއް ޕޯސްޓު ކޮށްފަ އެވެ.

ޝުޖާއު ވިދާޅުވީ ބޭރު ފަރާތްތަކަށް ބިން މިލްކު ކުރެވޭ ގޮތަށް ގާނޫނުއަސާސީ ބަދަލު ކުރުމަށް ފަހު ލިބިވަޑައިގެންނެވި އުފާވެރި އިހުސާސް ރައްޔިތުންނާ ހިއްސާ ކުރެއްވި ވަގުތުން ފެށީގެން އެމްޑީޕީ އާއި އޭރު އިދިކޮޅުގައި ހުންނެވި ކުރީގެ ނައިބު ރައީސް މުހައްމަދު ޖަމީލް ފާޑު ވިދާޅުވި ކަމަށެވެ.

އެކަން ޔާމީނަށް އެ ދުވަހު އުފަލަކަށްވި ނަމަވެސް މިއަދު ބިން މިލްކު ނުކުރެވޭ ގޮތަށް އަދި އެއަށް ވުރެ ބޮޑު މަޝްރޫއެއް ރައީސް ޑރ. މުހައްމަދު މުއިއްޒު ގެންނެވުމުން އެކަން ގަބޫލު ނުކުރެއްވެނީ ކީއްވެތޯ ޝުޖާއު ސުވާލު އުފެއްދެވި އެވެ.

"ހަމަ އެހާ އަމިއްލަ އެދުންފުޅު ބޮޑީތޯ؟ މަނިކުފާނަށް ނުކުރެވުނު ކަމެއް، ދިވެހި ރައްޔިތުންނަށް މާ ފައިދާ ބޮޑުވާނޭ ހެން، ދިވެހިރާއްޖޭގެ ފުރިހަމަ ސިޔާދަތީ ބާރު ހިނގާނޭގޮތައް ރައީސް މުއިއްޒު ކުރައްވާތީ އެކަމަށް ހަމަ ހިތްނޭދެނީތޯ؟" ޝުޖާއު ވިދާޅުވި އެވެ.

ޔާމީންގެ ވެރިކަމުގައި އެފަދަ އެންމެ ބޮޑު އިންވެސްޓްމަންޓަކަށް އައީ ފ. ހިމިތީ މަޝްރޫ އެވެ. އެ މަޝްރޫއަކީ ގާތްގަނޑަކަށް 10 ބިލިއަން ޑޮލަރުގެ މަޝްރޫއެކެވެ. ޔާމީން ވަނީ އެ މަޝްރޫއަށް ހުރަސް އެޅި ފަރާތްތައް ރަސްމާލޭގައި ހިނގާ 20 ބިލިއަން ޑޮލަރުގެ މަޝްރޫއަށް ހުރަސް ނާޅާތީ ވެސް ފާޑު ވިދާޅުވެފަ އެވެ.