ރަސްމާލެ: ޔާމީންގެ އޮތީ ކަންބޮޑުވުމާއި ޝަކުވާ!

ޔޫއޭއީގެ މަޝްހޫރު ޑިވަލޮޕަރު، އީގަލް ހިލްސް އިން ރަސްމާލޭގައި ހިންގާ 20 ބިލިއަން ޑޮލަރުގެ އިންވެސްޓްމަންޓާ ގުޅޭ ގޮތުން ކުރީގެ ރައީސް އަބްދުﷲ ޔާމީން ކަންބޮޑުވުން ފާޅު ކުރައްވައިފި އެވެ.

ރާއްޖޭގެ އިގްތިސާދު މުޅިން އެހެން ލެވަލް އަކަށް ބަދަލު ކޮށްލާނެ ކަމެއް ގޮތުގައި ސަރުކާރުން ސިފަ ކުރާ މި މަޝްރޫއާ ގުޅޭ ގޮތުން ޕީއެންއެފްގެ ފްރަންޓް އޮފީސް ޖަލްސާގައި ރޭ ޔާމީން ވިދާޅުވީ އެ މަޝްރޫއުގެ ސަބަބުން ރާއްޖެ އަށް ފައިދާއެއް ނުވާނެ ކަމަށާއި އޭގެ ބަދަލުގައި އެކަން ވެގެންދާނީ ދިވެހިންނަށް ސަލާމަތް ނުވެވިގެން އުޅޭ ކަމަކަށެވެ.

މި ވެރިކަން ބަދަލުވެ ވަތަނީ ބަޔަކު ސަރުކާރާ ހަވާލުވެއްޖެ ނަމަ ފުރަތަމަ ކަމަކަށް އެ މަޝްރޫއު ހުއްޓުވާނެ ކަމަށް ވެސް ޔާމީން ވިދާޅުވި އެވެ.

މީގެ އިތުރުން އީގަލްސް ހިލްސްގެ މި މަޝްރޫއު ޔާމީން ސިފަ ކުރެއްވީ އިޒްރޭލުގެ ޔަހޫދީންގެ މަޝްރޫއެއް ގޮތުގަ އެވެ. ސަބަބަކީ ޔޫއޭއީ އާއި އިޒްރޭލާ ދެމެދު އޮންނަ ގާތް ގުޅުމެވެ.

އެ ގުޅުމުގެ ތެރެއިން ރަސްމާލޭގައި ވަޒަންވެރިވާނީ ޔަހޫދީން ކަމަށާއި އޭގެ ސަބަބުން ގައުމީ ސަލާމަތަށް ވެސް ނުރައްކާވެދާނެ ކަންކަން ހިނގުމުގެ ފުރުސަތު އޮތް ކަމަށް ޔާމީން ވިދާޅުވި އެވެ.

ޔާމީންގެ އެންމެ ބޮޑު އެއް ހިތްހަމަ ނުޖެހުމަކަށްވީ އެ މައްސަލާގައި އިދިކޮޅު ފަރާތްތަކުން މާ ބޮޑު ޕްރެޝަރެއް ނުކުރާތީ އެވެ.

ފ. އަތޮޅު ހިމިތީގައި ސައުދީ އަރަބިއްޔާ އިން މަޝްރޫއެއް ހިންގަން އުޅުމުން "ފާފު ވިއްކާލަނީ" ގެ ނަމުގައި ބޮޑު ކެމްޕެއިނެއް ހިންގައި ކުރީގެ ރައީސުންނާއި ދައުލަތުގެ އިއްޒަތުގެ ނިޝަންތައް އަރުވާފައި ތިއްބެވި ފަރާތްތަކުން އިހުތިޖާޖު ކުރާ އިރު މިފަހަރު އެއިން ބޭފުޅެއްގެ އަޑެއް ނީވޭ ކަމަށް ޔާމީން ވިދާޅުވި އެވެ.

ރަސްމާލެއިން 500 ހެކްޓަރު ބޭރު ބަޔަކަށް 99 އަހަރަށް ދޭން ވާނީ ރައްޔިތުންގެ ފެންނަ ނުފެންނަ ވޯޓެއް ނަގައިގެން ކަމަށް ވެސް ޔާމީން ވިދާޅުވި އެވެ.