ދިވެހިންނަށް ހިއްސާދޭ ރިސޯޓް މަަޝްރޫއަށް އަފީފުގެ ތާއީދު

ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވާ ދިވެހި އާއްމު ރައްޔިތުން ހިއްސާވާ ގޮތަށް ރިސޯޓް ތަރައްގީ ކުރަން ހިންގަން ނިންމާފައިވާ މަަޝްރޫއަށް ޗަމްޕާ ހުސެއިން އަފީފު ތާއީދުކަން ހާމަ ކުރައްވައިފި އެވެ.

ގައުމީ ޓޫރިޒަމް ދުވަސް ފާހަގަ ކުރަން ރޭ ބާސެލާސް ނަސްނަދުރަ ހޮޓެލްގައި ވާހަކަ ދައްކަވަމުން ރާއްޖޭގެ ޓޫރިޒަމްގެ އެއް ބާނީ ކަމަށްވާ އަފީފު ވިދާޅުވީ ދިވެހި ރައްޔިތުން ހިއްސާވާ ގޮތަށް 10 ރިސޯޓެއް ހަދައި މާކެޓަށް ނެރުމަކީ ޓޫރިޒަމަށް އަންނާނެ ވަރަށް ބޮޑު ބަދަލަކަށްވާނެ އެެވެ. އަދި މި މަޝްރޫޢު ކާމިޔާބުވާނެކަމަށް އޭނާ އުންމީދު ކުރައްވަ އެވެ. 

މީގެ އިތުރުން އަފީފު ވަނީ މިކަމުގައި ބައިވެރިވެވަޑައިގަންނަވަން ބޭނުންފުޅުވާކަން ވެސް އޭނާ ހާމަކުރެއްވި އެވެ.އޭނާ ވިދާޅުވީ ރާއްޖޭގެ ފަތުރުވެރިކަން މިހާ ހިސާބަށް އައީ ސަރުކާރާއި އަމިއްލަ ފަރާތްތަކާ ގުޅިގެން ކުރި މަސައްކަތުން ކަމަށާއި، ކުރިއަށް އޮތް ތަނުގައިވެސް ދާއިރާ ކުރިއަރާނީ އެގޮތަށް މަސައްކަތްކޮށްގެން ކަމަށް އޭނާ ފާހަގަކުރެއްވި އެވެ.

ރައީސް ޑރ. މުއިއްޒު ވަނީ ކުރިއަށް އޮތް 3 އަހަރު ތެރޭގައި ސަރުކާރު ކުންފުންޏަކުން 10 ރިސޯޓު ތަރައްޤީކޮށް ހުޅުވާނެ ކަމަށް ވިދާޅުވެފަ އެވެ. މި މަސައްކަތް ނޮވެމްބަރު މަހު ފަަށާނެ ކަމަށްވެސް ވިދާޅުވި އެވެ. އަދި އޭގެ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދިނުމަށް ރިސޯޓުތަކުގެ ހިއްސާދާރުންނަކީ ދިވެހިން ކަމަށް ގާނޫނަކުން ކަނޑައަޅަން ވަނީ ނިންމާފަ އެވެ.