އިޓަލީގެ ޓޫރިސްޓުން ސަލާމަތްކުރަން އުޅުމުގެ ތެރޭގައި ޝަހީދުވި މަހުދީގެ ހަނދާނަށް އިޓަލީގެ އެންމެ މަތީ ޝަރަފު އަރުވައިފި

ވ. އަތޮޅު ކަނޑުއަޑީގެ ހޮހަޅައަކަށް ގެއްލުނު އިޓަލީގެ ފަސް މީހުން ހޯދުމަށް ދިވެހި އަސްކަރިއްޔާއިން ހިންގި ޚާއްސަ އޮޕަރޭޝަންގައި ފުރާނަ ގުރުބާންކުރި ސާޖަންޓް ފަސްޓްކްލާސް މުހައްމަދު މަހުދީގެ އަގުވަޒަންކޮށް، އިޓަލީ ސަރުކާރުން އަރުވާ ހިތްވަރުގަދަކަމުގެ އެންމެ މަތީ ޝަރަފު ކަމަށްވާ "ގޯލްޑް މެޑަލް ފޯ ސިވިލް ވެލާ" އޭނާގެ ހަނދާނަށް އިއްޔެ އަރުވައިފިއެވެ.

ރާއްޖެއާއި އިޓަލީއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރުމާއި، އިޓަލީގެ 80 ވަނަ ގައުމީ ދުވަސް ފާހަގަކުރުމަށް ރޭ ބާސެލޯ ނަސަންދުރާގައި ބޭއްވި ރަސްމިއްޔާތުގައި މަހުދީގެ އާއިލާއާ މި ލިޔުން ހަވާލުކޮށްދެއްވީ ރާއްޖެއާއި ލަންކާއަށް އިޓަލީން ކަނޑައަޅުއްވާފައި ހުންނަވާ ސަފީރު ޑެމިއާނޯ ފްރެޑްރިޗް އެވެ. މި ހަފުލާގައި އިކޮނޮމިކް މިނިސްޓަރު މުހައްމަދު ސައީދާއި ސަރުކާރުގެ އިސް ވެރިން ބައިވެރިވެވަޑައިގެންނެވިއެވެ.

އާއިލާއަށް އެހީވުމަށް ފަންޑު ހުޅުވާލުން:

މަހުދީގެ ހިތްވަރުގަދަ ޚިދުމަތުގެ އަގުވަޒަންކުރުމުގެ އިތުރުން، އޭނާގެ އާއިލާއަށް މާލީ އެހީތެރިކަން ފޯރުކޮށްދިނުމަށްޓަކައި އިޓަލީ ސަރުކާރުން ވަނީ މާލީ އެހީ އެއްކުރުމުގެ ކެމްޕޭނެއް ފަށާފައެވެ:

• އިންތިޒާމުކުރާ ފަރާތް: ކޮލަމްބޯގައި ހުންނަ އިޓަލީ އެމްބަސީއާއި ރާއްޖޭގައި ހުންނަ އިޓަލީގެ އޮނަރަރީ ކޮންސިއުލް އޮފީސް ގުޅިގެންނެވެ.

• އެކައުންޓްގެ ތަފްސީލު: "މަހުދީ މެމޯރިއަލް ފަންޑު" ގެ ނަމުގައި މޯލްޑިވްސް އިސްލާމިކް ބޭންކް (އެމްއައިބީ) ގައި ހުޅުވާފައިވާ އެކައުންޓަކަށް މި އަހަރުގެ ނިޔަލަށް އެހީ ޖަމާކުރެވޭނެ އިންތިޒާމު ވަނީ ހަމަޖައްސާފައެވެ.

ހާދިސާ ހިނގައިދިޔަ ގޮތުގެ ފަސްފަހަތް:

• ގެއްލުނު މީހުން: މިދިޔަ މޭ މަހު ވ. އަލިމަތާ ކައިރިން 60 މީޓަރު އަޑީގައި އޮންނަ ކޭވްއެއް ބަލަން ފޭބި އިޓަލީގެ ހަތަރު ފަތުރުވެރިންނާއި، އެ މީހުން ގޮވައިގެން ދިޔަ ސަފާރީގެ އިޓަލީ ޑައިވިން އިންސްޓްރަކްޓަރު ވަނީ ކަނޑުއަޑިއަށް ގެއްލިފައެވެ.

• މަހުދީ ޝަހީދުވުން: އެ މީހުން ހޯދުމުގެ ނުރައްކާތެރި އޮޕަރޭޝަންގައި ހަރަކާތްތެރިވަމުން ދަނިކޮށް އެމްއެންޑީއެފްގެ ޑައިވަރު މަހުދީ ޑީކޯވެގެން ވަގުތުން މާލެ ގެނެސް އޭޑީކޭ ހޮސްޕިޓަލުގައި ފަރުވާދެމުން ދަނިކޮށް ވަނީ ނިޔާވެފައެވެ.

• ހަށިގަނޑުތައް ހޯދުން: މި ހިތާމަވެރި ހާދިސާއަށްފަހު އޮޕަރޭޝަން މެދުކަނޑާލި ނަމަވެސް، ފަހުން ފިންލެންޑުގެ ތަޖުރިބާކާރު ޑައިވަރުންގެ ޓީމަކާއި، އެމްއެންޑީއެފް އަދި ފުލުހުން ގުޅިގެން ހިންގި ޚާއްސަ ރިކަވަރީ މިޝަނެއްގައި މީހުންގެ ހަށިގަނޑުތައް ނަގައި ވަނީ އިޓަލީއަށް ފޮނުވާލާފައެވެ.