މާލޭގެ މަގުތަކުގެ %80 އުޅަނދުން ފުރިފަ، މީހަކަށް ދެ އުޅަނދު !

މާލޭގެ މަގުތަކުގެ ތޮއްޖެހުން މިދިޔަ ފަސް އަހަރު ތެރޭގައި ވަނީ އިތުރުވެފަ އެވެ. ހާއްސަކޮށް އުޅަނދުތައް ގިނަވެ ޕާކު ކުރާނެ ޖާގަ ނެތި މަގުގެ އެތައް މިތަނުގައި "އުކާލާފައިވާ" އުޅަނދުތައް ފެންނަލެއް ވަނީ އާއްމުވެފަ އެވެ. މި މައްސަލަ ގޮސްފައިވާ ހިސާބުގެ އެންމެ ފަހުން އެނގިގެން ގޮސްފައިވަނީ "އަހާފޯރަމްގައި އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވި ފާހަކަ ފުޅުންނެވެ.

މިނިސްޓަރު ސައީދު ވިދާޅުވި ގޮތުގައި މާލެ ސަރަހައްދުގައި ރަޖިސްޓްރީ ކޮށްފައިވާ ވެހިކަލްތަކުގެ ޖުމްލަ އަދަދު 130،806 އަށް އަރާއިރު، އޭގެ ތެރޭގައި 14،911 ކާރާއި 115،895 ސައިކަލު ހިމެނެ އެވެ. މި އަދަދުން ބަލާނަމަ އެންމެފަހުން 2022 ގައި ބޭއްވި ބޯހިމެނުމުގެ ހިސާބުތަކުން ދައްކާ ގޮތުން މާލޭގެ އާބާދީއަކީ 212,138 ކަމަށް ބެލިނަމަވެސް ގާތްގަނޑަކަށް މީހަކަށް ދެ އުޅަނދު ޖެހެ އެވެ. 

އަހާފޯރަމްގައި މިނިސްޓަރު މުހައްމަދު ސައީދު

މިނިސްޓަރު ވިދާޅުވި ގޮތުގައި މާލެއަކީ އިތުރަށް ޖާގަ ބޮޑުކުރެވެން ނެތް ތަނަކަށްވުމާއެކު ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލް ކުރެވިފައިވާ ޒޯނަކަށް ހަދައި އާންމު ދަތުރުފަތުރުގެ ނިޒާމަށް (މާސް ޓްރާންސްޕޯޓަށް) ބަރޯސާވާ މިންވަރު އިތުރުކުރުންކަމަށް އެމަނިކުފާނު ފާހަގަކުރެއްވި އެވެ. މި މައްސަލައަށް ޙައްލެއް ހޯދުމުގެ ގޮތުން، ޓްރެފިކް ބާރުބޮޑުވާ ގަޑިތަކަށް (ރަޝް އަވާރސްއަށް) ހާއްސަކޮށްގެން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން މާލެ އަށް ދަތުރުކުރާނެ ބަސް ތަކެއް ތަޢާރަފްކުރުމުގެ މަސައްކަތް ސަރުކާރުން ދަނީ ކުރަމުންނެވެ. މީގެ އިތުރުން، ސްކޫލްތަކަށް ދަތުރުކުރާ ދަރިވަރުންނަށް ފަސޭހަވާނެހެން "ސްކޫލް ފްރެންޑްލީ" ބަސް ތަކެއް ތަޢާރަފްކުރުމަށް ވެސް ވަނީ ރާވާފަ އެވެ.

މާލޭގެ ޓްރެފިކް މައްސަލަތައް ޙައްލުކުރުމަށް ޚާއްޞަ މިނިވަން އޮފީހެއް ޤާއިމްކޮށް މިހާރު އަމަލީ މަސައްކަތް ފަށާފައިވާއިރު، މާލޭގެ ރިންގް ރޯޑުގެ މަސައްކަތް ނިންމުމާއި، ޓްރެފިކް ލައިޓް ހަރުކުރުމާއި މަގުމަތީގައި ފުލުހުންގެ ހަރަކާތްތެރިކަން އިތުރުކުރުން ފަދަ ގިނަ ފިޔަވަޅުތަކެއް އެޅުމަށް ވަނީ ހަމަޖެހިފައެވެ.