ބޭރު ފައިސާ މާރުކުރުމުގެ ނަމުގައި ހިންގާ ސްކޭމްތައް އިތުރުވާތީ ސަމާލުވާން ފުލުހުން އިލްތިމާސްކޮށްފި

ބޭރު ފައިސާ މާރުކޮށްދޭނެ ކަމަށް ބުނެ މަކަރާއި ހީލަތުން ފައިސާ ހޯދާ މައްސަލަތައް އިތުރުވަމުންދާތީ، އެފަދަ މުއާމަލާތްތަކުގައި އިތުރަށް ސަމާލުވެ ރައްކާތެރިވުމަށް މޯލްޑިވްސް ޕޮލިސް ސާވިސް އިން އާންމުންނަށް އިލްތިމާސްކޮށްފިއެވެ.

ފުލުހުން އާންމުކުރި ތަފާސްހިސާބުތަކަށް ބަލާއިރު، މިދިޔަ އޮކްޓޯބަރު މަހުގެ 25 އިން 31 ގެ ނިޔަލަށް ހުށަހެޅި ސްކޭމްގެ 32 މައްސަލައިގެ ތެރެއިން އެންމެ ގިނައީ ޑޮލަރު ނުވަތަ ބޭރު ފައިސާ މާރުކުރުމުގެ ނަމުގައި ހިންގާފައިވާ މައްސަލަތަކެވެ. އެގޮތުން އެ ބާވަތުގެ 17 މައްސަލައެއް ފާއިތުވި ހަފުތާގައި އެކަނިވެސް ވަނީ ރިޕޯޓުކޮށްފައެވެ.

ރައްކާތެރިވުމަށް ފުލުހުންގެ އިރުޝާދު:

• އާދަޔާ ޚިލާފު ރޭޓްތަކަށް ސަމާލުވުން: ބާޒާރުގެ އާންމު ރޭޓަށް ވުރެ އާދަޔާ ޚިލާފަށް ރަނގަޅު އަގުތަކުގައި ފައިސާ މާރުކޮށްދޭން ހުށަހަޅާ ނަމަ، އެއީ ސްކޭމަކަށް ވުމުގެ ފުރުސަތު ބޮޑު ކަމަށް ފުލުހުން ބުނެއެވެ.

• ފައިސާ ލިބުނުކަން ޔަގީންކުރުން: މުއާމަލާތްކުރާ ފަރާތުން ފައިސާ ޖަމާކުރިކަން އެކައުންޓަށް ބަލައި ކަށަވަރުނުވަނީސް، އަމިއްލަ އެކައުންޓުން އެއްވެސް ފައިސާއެއް ޓްރާންސްފާ ނުކުރުން.

• ކާކުވަކިކަން ކަށަވަރުކުރުން: މުއާމަލާތްކުރާ މީހަކީ ކާކުކަން ސާފުކޮށް ޔަގީންނުވާ ހާލަތްތަކުގައި އެއްވެސް މާލީ މުއާމަލާތެއް ނުހިންގުމަށް ވަނީ އިލްތިމާސްކޮށްފައެވެ.

މާލީ ގެއްލުމާއި ސްކޭމް ހިންގި ގޮތުގެ ތަފްސީލު:

• ގެއްލުނު ފައިސާ: ރިޕޯޓުކުރެވުނު 32 މައްސަލައިގައި އާންމުންގެ އަތުން ޖުމްލަ 737،695 ރުފިޔާ ގެއްލިފައިވާއިރު، އޭގެ ތެރެއިން ފުލުހުންނަށް އަނބުރާ ހޯދުނީ 144،558 ރުފިޔާއެވެ.

• އެހެނިހެން މައްސަލަތައް: ފައިސާ މާރުކުރުމުގެ މައްސަލަތަކުގެ އިތުރުން އީ-ކޮމާސްއާ ގުޅޭ 6 މައްސަލައަކާއި، އިންވެސްޓްމަންޓް ސްކޭމްގެ 4 މައްސަލައާއި، މީހެއްގެ ނަމުގައި އޮޅުވާލައިގެން ފައިސާ ހޯދި މައްސަލައެއް އަދި އެހެނިހެން ބާވަތުގެ 4 މައްސަލައެއް ހިމެނެއެވެ.

• ބޭނުންކުރި ވަސީލަތްތައް: މިފަދަ ސްކޭމްތައް ހިންގުމަށް އޮންލައިން މެސެޖިން އެޕްތަކާއި، ފޭސްބުކް މާކެޓްޕްލޭސް، އައިބޭ، ޓިކްޓޮކް އަދި ފިޝިން ލިންކުތަކުގެ އިތުރުން އޮޅުވާލައިގެން ކުރާ ފޯނު ކޯލްތައް ބޭނުންކޮށްފައިވާކަން ފާހަގަކުރެވިފައިވެއެވެ.